| |
| ON dict bien vray, la maulvaise Fortune | |
| Ne vient jamais qu’elle n’en apporte une | |
| Ou deux ou trois avecques elle (Syre). | |
| Vostre cueur noble en sçauroit bien que dire; | |
| Et moy, chetif, qui ne suis Roy ne rien, | 5 |
| L’ay esprouvé, et vous compteray bien, | |
| Si vous voulez, comme vint la besongne. | |
| J’avois un jour un vallet de Gascongne, | |
| Gourmand, ivrongne, et asseuré menteur, | |
| Pipeur, larron, jureur, blasphemateur, | 10 |
| Sentant la hart de cent pas à la ronde, | |
| Au demourant, le meilleur filz du monde, | |
| Prisé, loué, fort estimé des filles | |
| Par les bordeaulx, et beau joueur de quilles. | |
| Ce venerable hillot fut adverty | 15 |
| De quelque argent que m’aviez departy, | |
| Et que ma bourse avoit grosse apostume; | |
| Si se leva plus tost que de coustume, | |
| Et me va prendre en tapinoys icelle, | |
| Puis vous la meit tresbien soubz son esselle | 20 |
| Argent et tout (cela se doit entendre), | |
| Et ne croy point que ce fust pour la rendre, | |
| Car oncques puis n’en ay ouy parler. | |
| Brief, le villain ne s’en voulut aller | |
| Pour si petit; mais encore il me happe | 25 |
| Saye et bonnet, chausses, pourpoint et cappe; | |
| De mes habitz (en effect) il pilla | |
| Tous les plus beaux, et puis s’en habilla | |
| Si justement, qu’à le veoir ainsi estre, | |
| Vous l’eussiez prins (en plein jour) pour son maistre. | 30 |
| Finablement, de ma chambre il s’en va | |
| Droict à l’estable, où deux chevaulx trouva; | |
| Laisse le pire, et sur le meilleur monte, | |
| Pique et s’en va. Pour abreger le compte, | |
| Soyez certain qu’au partir du dict lieu | 35 |
| N’oublia rien fors qu’à me dire adieu. | |
| Ainsi s’en va, chatouilleux de la gorge, | |
| Ledict vallet, monté comme un Sainct Georges, | |
| Et vous laissa Monsieur dormir son soul, | |
| Qui au resveil n’eust sceu finer d’un soul. | 40 |
| Ce Monsieur là (Syre) c’estoit moy mesme, | |
| Qui, sans mentir, fuz au matin bien blesme, | |
| Quand je me vey sans honneste vesture, | |
| Et fort fasché de perdre ma monture; | |
| Mais de l’argent que vous m’aviez donné, | 45 |
| Je ne fuz point de le perdre estonné; | |
| Car vostre argent (tresdebonnaire Prince) | |
| Sans point de faulte est subject à la pince. | |
| Bien tost après ceste fortune là, | |
| Une autre pire encores se mesla | 50 |
| De m’assaillir, et chascun jour m’assault, | |
| Me menaçant de me donner le sault, | |
| Et de ce sault m’envoyer à l’envers, | |
| Rithmer soubz terre et y faire des vers. | |
| C’est une lourde et longue maladie | 55 |
| De trois bons moys, qui m’a toute eslourdie | |
| La povre teste, et ne veult terminer, | |
| Ains me contrainct d’apprendre à cheminer | |
| Tant affoibly m’a d’estrange manière; | |
| Et si m’a faict la cuysse heronniere, | 60 |
| L’estomac sec, le ventre plat et vague: | |
| Quand tout est dit, aussi mauvaise bague | |
| Ou peu s’en fault que femme de Paris, | |
| Saulve l’honneur d’elles et leurs maris. | |
| Que diray plus au misérable corps | 65 |
| Dont je vous parle il n’est demouré fors | |
| Le povre esprit, qui lamente et souspire, | |
| Et en pleurant tasche à vous faire rire. | |
| Et pour autant (Syre) que suis à vous, | |
| De trois jours l’un viennent taster mon poulx | 70 |
| Messieurs Braillon, Le Coq, Akaquia, | |
| Pour me garder d’aller jusqu’à quia. | |
| Tout consulté, ont remis au printemps | |
| Ma guarison; mais, à ce que j’entens, | |
| Si je ne puis au printemps arriver, | 75 |
| Je suis taillé de mourir en yver, | |
| Et en danger, si en yver je meurs, | |
| De ne veoir pas les premiers raisins meurs. | |
| Voilà comment, depuis neuf moys en ça, | |
| Je suis traicté. Or, ce que me laissa | 80 |
| Mon larronneau, long temps a l’ay vendu, | |
| Et en sirops et julez despendu; | |
| Ce neantmoins, ce que je vous en mande | |
| N’est pour vous faire ou requeste ou demande; | |
| Je ne veulx point tant de gens ressembler, | 85 |
| Qui n’ont soucy autre que d’assembler; | |
| Tant qu’ilz vivront ilz demanderont, eulx; | |
| Mais je commence à devenir honteux, | |
| Et ne veulx plus à voz dons m’arrester. | |
| Je ne dy pas, si voulez rien prester, | 90 |
| Que ne le prenne. Il n’est point de presteur | |
| (S’il veult prester) qui ne face un debteur. | |
| Et sçavez-vous (Syre) comment le paye? | |
| Nul ne le sçait, si premier ne l’essaye; | |
| Vous me devrez (si je puis) de retour, | 95 |
| Et vous feray encores un bon tour. | |
| A celle fin qu’il n’y ait faulte nulle, | |
| Je vous feray une belle cedulle, | |
| A vous payer (sans usure, il s’entend) | |
| Quand on verra tout le monde content; | 100 |
| Ou si voulez, a payer ce sera | |
| Quand vostre loz et renom cessera. | |
| Et si sentez que soys foible de reins | |
| Pour vous payer, les deux princes Lorrains | |
| Me plegeront. Je les pense si fermes | 105 |
| Qu’ilz ne fauldront pour moy à l’un des termes. | |
| Je sçay assez que vous n’avez pas peur | |
| Que je m’enfuye ou que je soys trompeur; | |
| Mais il faict bon asseurer ce qu’on preste; | |
| Bref, vostre paye, ainsi que je l’arreste, | 110 |
| Est aussi seure advenant mon trespas | |
| Comme advenant que je ne meure pas. | |
| Avisez donc si vous avez desir | |
| De rien prester; vous me ferez plaisir, | |
| Car puis un peu j’ay basty à Clement, | 115 |
| La où j’ay faict un grand desboursement; | |
| Et à Marot, qui est un peu plus loing, | |
| Tout tombera, qui n’en aura le soing. | |
| Voila le poinct principal de ma lettre; | |
| Vous sçavez tout, il n’y fault plus rien mettre. | 120 |
| Rien mettre? Las! Certes, et si feray; | |
| Et ce faisant, mon style j’enfleray, | |
| Disant: ‘O Roy amoureux des neuf Muses, | |
| Roy en qui sont leurs sciences infuses, | |
| Roy plus que Mars d’honneur environné, | 125 |
| Roy le plus roy qui fut onc couronné, | |
| Dieu tout puissant te doint pour t’estrenner | |
| Les quatres coings du monde gouverner, | |
| Tant pour le bien de la ronde machine, | |
| Que pour autant que sur tous en es digne.’ | 130 |
| |
